30 декември, 2005

Честитки

Ласицата доаѓа да им каже „Среќна Нова Година“ на кокошките.
Kинеска поговоркa

Не давајте ласицата да ги изеде вашите другарчиња. (ласица 1, ласица 2) Пратете им честитка.

Free Image Hosting at www.ImageShack.us Free Image Hosting at www.ImageShack.us Free Image Hosting at www.ImageShack.us Free Image Hosting at www.ImageShack.us Free Image Hosting at www.ImageShack.us Free Image Hosting at www.ImageShack.us

Design by spanky ham, martin, volan, кајгана (Acid?).

Место среќна нова.

Scary Movie

Не толку охрабрувачко продолжение на оптимистичката најава:
Во Хотелот “Континентал“ во Скопје се одржа основачко собрание на Комората за информатичко комуникациска технологија и услуги Македонија („ИКТ“). На собранието учествуваа шеесетина претпријатија од информатичко комуникациската технологија...

За претседател на ИКТ комората беше избран г-дин Предраг Чемерикиќ, генерален менаџер и основач на Он Нет...

Новата комората ќе бара активно да се вклучи во работењето на КИТ (Комисијата за информатичка технологија) и Агенцијата за електронски комуникации, потоа ќе бараме да имаме увид во работата на второстепената владина комисија за јавни набавки... Исто така ќе ја охрабруваме владата, локалната самоуправа, фирмите и семејствата да ги користат повеќе технологиите, персоналните компјутери, Интернетот, мобилната и Интернет телефонија... (повеќе)
Се моли претседателот на комората, пред да се вклучи во работата на АЕК, да одговори на следното прашање:
Знам дека skopjewifi.com ви висат на глава за користење на 2.4Ghz фреквенцијата за комерцијални цели.

Може ли да се случи да не постои оннет вифи? Ако се случи Управата за телекомуникации да ве забрани, се разбира. А ако тоа се случи, многу од нас ќе бидат доста лути
Би било фино, пред да направи увид во работата на владината комисија за јавни набавки, претседателот да каже и дали некои интересни справички за нивната безжична мрежа се набавени без одобрение за увоз.
Админ коментирај!

28 декември, 2005

Фреквенции за безжичен пристап

Тројца претставници од Интернет Македонија присуствуваа на јавната дискусија за користењето на радиофреквенциските опсези за безжичен пристап до корисниците. Настанот се одржа вчера на Зајчев рид и бил многу посетен.

Некомерцијалниот фреквентен опсег од 2.4Ghz не требаше да биде предмет на дискусија, но сепак е поставено прашање зошто ОнНет го уништува истиот со енормно зрачење. Најавени се тестови од АЕК.

Повеќе овде.

27 декември, 2005

ОнНет објави цени за wi-fi интернет!

Мислев дека ова нема до го доживеам.

Пакет Wi-Fi: 512 kbps, 2GB, 990 МКД (со ДДВ)
Пакет WADSL: 768 kbps, 8GB, 2350 MKД (со ДДВ)
Пакет Wi-Fi Box: 512 kbps, 24GB, опрема, 9995 МКД (со ДДВ)

За повеќе, трк овде.
Ако кликнете овде ќе видите „АДСЛ - наскоро“. Шо збориш бе Блажо?

Првично мислам дека ми се потврди дека „дуопол“ не е многу поразлична состојба од „монопол“. Сепак, почетниот пакет им е далеку подобар по цена, брзина и по сообраќај во споредба со старт АДСЛ каде за 1500 денари се нудат „фантастични“ пола гига.

Средниот е ист по цена со макс АДСЛ (абе да бевте поинвентивни па да смислевте нова бројка), ама нуди дупло поголема брзина, дупло повеќе сообраќај.... и да, прекин на услугата по 8 гига. :( Е не, ќе ми симињате филмови. Со максот на МТ Њет сепак може да се истераат 20 гига, под услов да имате сајли место живци.

Последниот пакет од 10 000 денари е за побезболно да се стигне до опремата - има вклучено безжичен уред и USB кабел. Прашањето е: за колку време ќе направиш 24 гига? Пола месец, месец, или година?

Е сега фали уште некој да биде така добар да проба, па ако не се изгори... :)

Прашање до Телеком: ќе има уште една новогодишна понуда? Ама стварно понуда, а не од оние шарени балочиња што се дишат штом се надуваат? И да... на колку ќе биде намалувањето на брзината? На 64/64 kbps? :)

ДОПОЛНА: Од другата страна... линк 1, линк 2, линк 3, линк 4.
ИЗМЕНА: Променет е коментарот за Wi-Fi Box.

Средба во АЕК

На обуката во петокот беше искористено присуството на директорот на Агенцијата за електронски комуникации и беше договорена средба за проблемите со АДСЛ услугите. Денес, во името на Интернет Македонија, имавме двочасовен состанок во АЕК.

Бев изненаден што луѓето од Агенцијата самите предложија Интернет Македонија да ги застапува интернет корисниците во комуникацијата со АЕК. Во АЕК имаат примено повеќе приговори за АДСЛ-от и ни признаа дека би им се олеснила работата ако постои некој што ќе ги синтетизира проблемите и кој би бил некој вид посредник меѓу интернет корисниците и Агенцијата.

Беа објаснети проблемите и мислам дека сфатија дека не бараме преку леб и погача, ниту пак дека имаме некоја скриена агенда.

Во врска со намалувањето на брзината, после кратка дискусија беше прифатено дека сегашното ниво на намалување е прекршување на договорот и дека наплата на пенали во услови на променет договор е незаконска.

Покрај тоа, се опфати прашањето за контрола на мерачот на АДСЛ сообраќај - тема од која сите бегаат. Пазарниот инспекторат веќе се прогласи за ненадлежен за контрола зошто немале соодветен правилник, па не можеле да си ја исполнат обврската од Законот за метрологија (?!). Бирото за метрологија немало инструменти, а денес нешто слично беше наведено и од АЕК. Како премостување на проблемот се согласивме дека во вакви услови Телеком својот мерач треба да го замени со друг - набавен и сертифициран во странство и истиот да подлежи на контрола од странски независни тела.

Беше актуелизирано и прашањето на корисниците кои без своја волја се префрлени на пакетите со доплата по надминување на лимитот и беше побарано од АЕК да реагира кај ваквите случаи.

На крај се договоривме Здружението во текот на оваа недела да поднесе барање до Агенцијата со сите точки за кои се согласивме дека нешто може да се преземе. Не очекувам чуда, но вреди да се проба.

Там-там комуникација

Денешен Дневник повторно се бави со интернетот во Македонија. Бидејќи некои се посомневаа дека на обуката сме им ги переле мозоците на новинарите, уште еднаш ќе повторам: човекот не беше на обуката.
...На сите им е јасно дека главната причина за слабото користење на Интернетот е цената за оваа услуга, која е највисока во регионот...

Каква корист од тоа што Националната стратегија за развој на информатичкото општество може да се најде на владината веб-страница, кога него можат да го отворат само ограничен број граѓани. Досега ништо не е исполнето од тој документ, со кој се предвидува да се обезбеди евтин интернет-пристап за сите граѓани, да се либерализира пазарот и да се спречи ограничувањето на конкуренцијата.

Огромен дел од младата популација е информатички образована, но поради скапата цена не може да ги искористи сите предности на Интернетот.

Но, за Владата е важна дивидендата од телекомот за да пополни некоја буџетски дупка. И сега ајде сурфајте со "там-там" тапаните...
Целиот текст е овде.

L'art pour l'art

Во теоријата, статистиката е наука која служи за собирање податоци. Во пракса, статистиката служи за бранење или напаѓање на нешто. Така имаме тресачи на возови, кои се задолжени да создадат привид дека возот се движи, и кондуктори-диверзанти кои на патниците им објаснуваат дека тоа што возот се тресе не значи и дека се движи. Имавме случаи да се објавуваат оптимистички податоци за бруто домашниот производ, па истите да се прешминкаат во песимистички при смена на власта. Имавме случаи Статистика да објави песимистички податоци за индустриското производство, па после интензивни објаснувања дека возот навистина се движи, едноставно да се смени зачинот, т.е. статистичарот.

Во теорија, статистичките податоци служат за да се донесат правилни и навремени одлуки. Во пракса, статистиката служи за да се оправда постоењето на оние што ги собираат податоците. Ова последното го научив кога ми беше потребен конкретен податок за производството на јајца во Македонија, па човекот што беше надлежен за тоа ми рече „Тоа подобро побарај го на друго место, овој податок што ние го објавуваме е само реда ради.“

Последно, се фативме за гуша неколку блогери да се расправаме колку има интернет корисници во Македонија. (линк1, линк 2, линк 3) Целата расправа стана малку смешна, не само затоа што оние кои се надлежни мудро си молчат, туку повеќе поради намената на тој податок. Што ако Мијалче докаже дека тие 19% се релевантни, или ако јас докажам дека 6,2% се порелевантни. Кој ќе го земе предвид едниот или другиот податок и за кои практични мерки? За подобро да се примени Стратегијата и Политиката? Нема потреба за тоа. Сите се изјаснија дека стратегијата е супер. Е сега, тоа што не се спроведува... Зар такви ситници да не замараат? Си имаме ние статистика заради статистика и ич не му ја мислиме.

26 декември, 2005

Македонија и Зимбаве во ист кош

Подолу е пренесен текст од денешен Дневник. Се мислев дали ќе биде самобендисано да ставам скен, ама решив дека не е битно кој рекол, битна е пораката... еве скратена верзија:

Македонија има најскапи цени за интернет-пристап и со само 6,2 отсто од населението што користат Интернет е на претпоследното место во регионот, посочуваат од Здружението „Интернет Македонија“.

Во регионот зад нас е само Албанија, а во светски рамки сме на ниво на Зимбабве и Египет, кои имаат 6,8 отсто, односно 6 отсто корисници на Интернет. Меѓу земјите од регионот води Хрватска, со 32,2 отсто корисници. Во протекторатот Косово Интернет користат 11 отсто од граѓаните, во Црна Гора 16,1 отсто, во БиХ - 15,1 отсто, а во Бугарија - 15,4 отсто.

- Со вакви параметри не може да очекуваме брз влез во Европа и интегрирање во информатичкото општество. Квалитетен и евтин-интернет пристап е основа за широка достапност на услуги и знаења што овозможуваат забрзан економски пораст и подобрување на квалитетот на животот... Државниот апарат со недоволната агилност ги попречува интернет-процесите за што добива жолти картони од нас и ЕУ - вели Александар Николов, претседател на Здружението.

Членовите на „Интернет Македонија“ бараат Владата и Собранието веднаш да почнат да ја применуваат усвоената Национална стратегија за развој на информатичкото општество.
- Со тој документ се предвидува да се обезбеди евтин интернет-пристап за сите граѓани, либерализација на пазарот за информатички и телекомуникациски услуги и спречување на ограничувањето на конкуренцијата. Но државните органи ги игнорираат ваквите обврски. Агенцијата за електронските комуникации не ги донесува потребните правилници за либерализација на оваа дејност, за да можат и другите провајдери да се приклучат на мрежата на телекомот. Тоа би довело до намалување на цените, подобрување на квалитетот на услугите и повисоко ниво на користењет на Интернет. Владата најави дека ќе продаде пакет-акции во телекомот, па повикуваме дел од парите од продажбата да се искористат за да се спроведе стратегијата - вели Николов.

Од катастрофално ниското ниво на користење на Интернет е најпогодена младата популација, која не може да биде во чекор со врсниците од европските земји.

Лицемерие

Десно е писмо од Телеком како одговор на состанокот во врска со АДСЛ во Министерството за економија, одржан на 18.10.2005. Таму беа утврдени повеќе заклучоци, меѓу кои:
  • МТ да не наплаќа пенали од оние што раскинаа во периодот додека важеше огласот за новите цени;
  • да се дефинира брзината на која ќе се намалува брзината и тоа да не биде под нивото на broadband;
  • да се провери дали мерачот на сообраќај ги исполнува условите пропишани со законот за метрологија.
Едно делче ме изненади:
„...АД Македонски телекомуникации како компанија стратешки ориентирана на исполнување и задоволување на комуникациските потреби и можностите на своите корисници [?!] ...уште еднаш покажа дека ги прифаќа и имплементира препораките од своите корисници и институциите надлежни за заштита на нивните права.“
Аууу, кој би рекол!

Лево е одговорот. Тоа се добро познатите работи за кршење на договорите, неправилно мерење на сообраќајот, непочитување на законите...сега дополнети и со мистериозното префлање на корисниците на пакетите со доплата. Бидејќи МТ „ги прифаќа и имплементира препораките од корисниците и институциите за заштита на нивните права“ очекувам уште утре да реагираат. Да бе, не знаете што срцки се овие!

25 декември, 2005

За поинформирани новинари

Во петокот се одржа обуката за новинари „Либерализација на телекомуникацискиот пазар и зголемување на интернет-пенетрацијата во Македонија“. Настанот беше организиран од здружението Интернет Македонија и Фондацијата Метаморфозис. Се зборуваше за проблемите, можностите кои ги нудат законите, кој е одговорен за нивното спроведување или неспроведување и што треба да се направи за да се одглават работите. Обуката ќе биде успешна ако во иднина новинарите повеќе внимание посветуваат на прашањето како до подобар интернет и притоа ги отвораат вистинските теми.

Поздрав до луѓето од Министерството за транспорт и врски и до Агенцијата за електронски комуникации за нивното учество и за отвореноста за соработка. На моменти обуката прераснуваше во вистинска расправа меѓу луѓето од ИНТЕРНЕТ МАКЕДОНИЈА и претставниците од институциите, но тоа беше одлична можност за сите присутни да добијат пореална слика за состојбите. Директорот на Агенцијата, Коста Трпковски, покани претставници од ИНТЕРНЕТ МАКЕДОНИЈА на средба следната недела на која би се разговарало за проблемите со АДСЛ-от и за она што ќе го преземе Агенцијата. Тоа беше и целта на здружението - да се обраќа до медиумите, јавноста, операторите, државните органи и меѓународните организации за да се избори за подобар интернет во Македонија и за заштита на правата на корисниците. Ќе видиме дали поканата од АЕК беше искрена.

Повеќе, на сајтот на Метаморфозис. Делови од пресот, кој се одржа еден ден претходно, пренесоа Утрински, Канал 5 и НВО Инфоцентар.

21 декември, 2005

Како до подобар интернет (2)

Другото решение, покрај либерализацијата на мрежата на МТ, е изградба и користење на алтернативни мрежи (кабелски телевизии, безжични решенија, broadband преку кабли за струја). Во двата случаи се очекува зголемената конкуренција да ги смали цените и да ги подобри услугите.

Алтернативните мрежи веќе постојат со развојот на кабелските телевизии, но проблемот е што не ја опфаќаат цела Македонија, само дел од нив можат да нудат интернет, а уште помалку можат да нудат интернет со задоволителен квалитет. Безжичната мрежа на ОнНет крена многу врева, но засега функционира нелегално (линк 1, линк 2), а ретко кој очекува многу од дуопол. Веќе се виде на примерот на Мобимак и Космофон дека тоа не носи значајни подобрувања.

Најинтересна можност за брз пад на цените предлага Жарко и неколку луѓе од Арпанет - бесплатен wi-fi интернет. Капацитетот би бил мал, но сосема доволно за во одреден период да ги размрда провајдерите - и со цени и со квалитет.

За тоа да се оствари, АЕК треба да изврши распределба на комерцијални фрекфенции и да ги спречи злоупотребите на фрекфенцискиот спектар. Во двата случаи како кочничар за подобар интернет се јавува АЕК. Да се знае кој е крив и кој треба да се удри по глава.

Интересен сајт: MuniWireless
Цитат:
This site is devoted to municipal wireless broadband projects worldwide that are funded or supported by cities and towns...

We included a category called Community Wireless to highlight wireless projects organized and run by local residents, with or without support from the municipality. These grassroots initiatives — run by volunteers — force local and regional governments to remove barriers to affordable wireless (and wired) broadband access. Where governments have been too slow and risk-averse, these groups unwire their communities with do-it-yourself networks.

Владата ќе ја послуша Европа... едно 2/3

Конечно. Владата ќе ги шитка акциите од МТ. Според предлог-буџетот, една третина ќе задржи за да има постојан увид во работата на монополот. WTF?! Увид! Што аир видовме од досегашниот увид кој го имаа. Во мафијашките филмови главниот шеф секогаш мора да пази колку земаат малите шефови за одма да ги спука ако му кријат дел од пљачката.

Опозицијава е комична кога скока против ова. Истите луѓе кои стоеја зад продажбата на МТ. Им го разбирам „вознемирот“ кога гледаат како им се намалува потенцијалниот имот што би сакале они да го молзат. И ова:
Парите од продажбата ќе се употребуваат за полнење буџетски дупки и враќање долгови.
Ете, толку трубената национална стратегија за информатичко општество и натаму ќе служи како украс за полици.

Edit: насловот е сменет зошто се поклопи со наслов на пост на Panta Rei.

20 декември, 2005

Та не сме само ние

Минатата недела во рамки на Сојузот на стопанските комори се иницираше создавање на Комора за информатичко-комуникациски технологии и услуги („ИКТ Комора“). Детали пренесе денешен Дневник.
Иницијативата за ИКТ-комора ја покренуваат 25 фирми од речиси сите полиња на дејности како софтверски куќи, хардверски и софтверски дистрибутери, Интернет и кабелски оператори, продавници за ИКТ-опрема и услужни фирми...
Очигледно не сме единствени незадоволници:
Монополот на "Македонски телекомуникации" го забавува инвестирањето во информатичко-телекомуникациска технологија и услуги...

- Целото македонско стопанство го трпи монополот на телекомот и плаќа исклучително многу за телефонија и за Интернет во однос на другите земји во Европа. Во такви услови, претпријатијата се исцрпуваат финансиски и се сконцентрирани на "преживување". За инвестирање во поголем обем во информатичко-комуникациска технологија не ни помислуваат - велат во ССК...
На исти места ги лоцираме проблемите:
Во ССК укажуваат дека државните тела, Комисијата за информатичка технологија и Агенцијата за електронски телекомуникации малку направиле за да се зголеми бројот на корисниците на компјутери, Интернет и мобилна телефонија. Поради тоа сме на последните места во регионот во овие категории...
Еве одличен партнер со кој може да соработува ИНТЕРНЕТ МАКЕДОНИЈА.
(Линк 1; линк 2)

19 декември, 2005

Хрватска Vs. Deutsche Telekom

Хрватското искуство е интересно за нас. Таму либерализацијата на локалната мрежа на хрватскиот телеком (ХТ) законски требаше да почне со почетокот на годинава. Нивната агенција за телекомуникации малку се заборави, па го донесе правилникот за пристап кон локалната јамка во април 2005. После тегавење од дополнителни 6 месеци на 20 октомври Aгенцијата за телекомуникации донесе одлука да ја корегира референтната понуда на ХТ. Со тоа ги намали за 32% месечните цени кои новите оператори ќе мора да ги плаќат за пристап до телефонските приклучоци (од 10 евра колку што барал ХТ, на околу 7 евра по приклучок).

Еден од нивните провајдери со многу инвентивно име - Х1 - дури најави и АДСЛ2+:
Odluka Agencije omogućava i da H1 na hrvatsko tržište uvede najsuvremeniju telekomunikacijsku uslugu – Triple play. Koristeći ADSL2 + tehnologiju građani će polovicom iduće godine, kroz jedinstveni priključak, po jedinstvenoj cijeni dobiju – telefonske usluge, 40ak TV programa i pristup Internetu, čija je brzina nekoliko puta veća od trenutno prisutnih na tržištu i doseže i do 24 Mbit-a u sekundi", kažu u H1.
Ова е планирано во соработка со Самсунг, кој имаше и еден предлог за broadband, VoIP и ТВ преку мрежата на ЕСМ, ама нашата Влада го одби пошто и е поедноставно да го шитне ЕСМ одошто да инвестира во него.

Препродажбата на Телекомски АДСЛ од страна на други оператори и bit-stream услугите не носат пониски цени, па затоа не ги гледам како алтернатива за либерализацијата на локалната мрежа (LLU). Во Хрватска и порано имаше препродавачи на АДСЛ-от, но тоа го правеа како привремено решение само колку да стекнат корисници се додека не се разврзе локалната јамка, што фактички се случи во ноември 2005.

Значи, на Хрватите им требаа 10 месеци за ефективно LLU. Кај нас сите документи за LLU требаше да се донесат до 5-ти септември, но тоа не е направено. Дежурно алиби на Владата е дека АЕК е независно тело. Бреееј! Ја се си мислев дека функционери се назначуваат по партиска директива врз основа на коалициски договор што се оверува во Собранието. А тоа - АЕК независна, Собранието независно, само ние зависни од интернет. Од АЕК се уште поинвентивни, па стално се вадат со тоа дека се во „процес на формирање“. Како да не сумњам дека ваквото развлекување не е во договор со МТ, за уште малку да си го продолжат времето на непречено музење?

Како до подобар интернет за сите (1)

Најголема пречка за ова се мрежите до крајните корисници. Цената за нивна изградба надминува 1/2 од вкупната инвестиција потребна за да се нуди интернет. Во моментов единствено МТ имаат комерцијална мрежа која ја покрива цела Македонија и во вид на телефонски приклучоци стигнува до скоро секоја институција, куќа и стан. Тоа ги става во нефер предност пред останатите провајдери, кои тешко можат да го преземат ризикот да градат паралелна мрежа, во услови кога МТ може во секое време да ги намали напумпаните цени и да им ја направи инвестицијата неисплатлива.

Затоа се бара либерализација на постојната локална мрежа на Телеком (Local Loop Unbundling), што значи дека секој оператор ќе може да нуди услуги преку нивната бакарната мрежа - за одреден надомест кој е фер и еднаков за сите.

За да се случи ова треба заспаната убавица да изготви соодветен правилник и да го притисне Телеком да објави фер услови и цени за користење на нивната локална мрежа. Жарко во коментар на претходниот пост напиша дека оваа варијанта ќе даде резултати само ако дојде во пакет со нов странски провајдер. Се слагам со него зошто мислам дека постојниве провајдери немаат воља ни капацитет да инвестираат во DSLAM-ови и друга опрема за АДСЛ.

18 декември, 2005

СТОП за Старт

Старт АДСЛ е за глупави! Тој пакет треба да се укине.

Маријана Лончар Велкова, претседател на Организацијата на потрошувачите на Македонија

Главен аргумент против StartADSL е неговиот преварантски карактер. Наменет е за broadband почетници, на кои веројатно нема да им биде јасно колку се 512 MB, па може да земат да пичат... До каде? Ај мала математика... Теоретската брзина на АДСЛ е 384 kb/s, а реалната ќе земеме дека е 85% од тоа. Ако врската се користи 30 дена со полна брзина ќе се направат над 100 GB сообраќај за неверојатна цена од само...43 000 денари?!

Ете од кај е името на пакетот! Стрижењето почнува со 1500 денари, а после тоа - the sky is the limit. Зошто првите 512 МB чинат 1500, а секои наредни 207 денари, е сторија за Unsolved Mysteries.

Друг метод на пљачка е што се наплаќа за започнат блок од 512 MB. Ова значи дека за 1 KB може да платиш 207 денари, а останатите 524 287 KB да им ги дадеш како бакшиш на МТ за „одличната“ услуга. Е ај за промена нека частат МТ: нека наплаќаат за секој завршен блок од 512 MB, а оние кои нема да го завршат блокот...нека им е со среќа, и онака се ближи Нова Година.

За крај, мала регионална компарација - во Хрватска, која има 80% повисок стандард од нас, Deutsche Telekom го продава StartADSL за 850 денари! Со се ДДВ. Секој нареден блок од 512 MB се наплаќа дополнителни 167 денари, но само ако од него се искористат повеќе од 256 MB... А да, брзината е 512/128.

Старт АДСЛ - неограничени можности за стрижење. Повелете во салоните на МТ.

Edit: Jован ме поправи дека цената на стар пакетот во Хрватска не е 167, туку 850 денари. Јас гледав овде каде дале цена од 20 куни за старт пакет, ама не видов дека наплаќаат и 79 куни за минималната брзина од 512/128. Ете, кога е Deutsche Telekom во прашање човек треба да пази на секое ќоше од понудата, за да не добие некои чудни сметки.

14 декември, 2005

Има ли пилот во авионот?

Пенали за раскин на прекршен договор, прекумерни пенали, лудо мерење на сообраќајот, сместување во пакет со доплата без барање од корисникот, наплата за период во кој е демонтирана услугата... 1001 прича. Може ваквите исповеди на среќни АДСЛ корисници да ги штампаме и да ги делиме пред салоните на МТ. Поголема антикампања - здравје. Ова беше насловено „Така ми треба!“

Здраво,

Во кратки црти сакам да ви ја раскажам мојата тажна, но сепак вистинита приказна. Корисник на АДСЛ сум од 03.06.2005 со договор на две години. На ден 03.10.2005 поради добро познатото известување во весниците поднесов приговор и барање за раскинување на договорот. Исклучувањето беше спроведено уште истиот ден со исклучување на АДСЛ конекцијата, а веќе наредниот ден вработено лице во АД „Македонски Телекомуникации“ изврши демонтирање на АДСЛ опремата (АДСЛ модем и сплитер). По изминати две седмици операторот донесе решение со можност на враќање на претходните услови (намалување на брзината по изминати 4ГБ сообраќај). Преку телефонски повик ми беше понудено од страна на вработени во АД „Македонски Телекомуникации“ повторно инсталирање на АДСЛ приклучок без надомест за повторно инсталирање на опрема. На 21.10.2005 како уредно учениче поднесов писмено барање за повторно приклучување и инсталирање на АДСЛ приклучок бидејќи немав другo решение освен Dial Up, а верувајте ги пробав сите ама на ниедно неможев да се приклучам (OnNet WiFi,CABLE ZORA итн.) Службени лица од АД „Македонски Телекомуникации“ на 23.10.2005 повторно ми го приклучија фамозниот АДСЛ приклучок. Со ова јас немав АДСЛ интернет од 03.10 до 23.10.

Во сметката за месец октомври многу добро ме изненадија со следнава ставка:
  • Макс АДСЛ период 01.10.2005-03.10.2005 со единечна цена од 193,00 денари без 18%ДДВ (ова е ОК)
  • Макс АДСЛ период *04.10.2005-16.10.2005* со единечна цена од 835,00 денари без 18%ДДВ (воопшто не е ОК)
  • Макс АДСЛ период *20*.10.2005-31.10.2005 со единечна цена од 770,00 денари без 18%ДДВ (не е ОК)
Ги свртев добро познатите бројчиња и којзнае по кој факинг пат им објаснив што се деси и нормално добив одговор дека треба да напишам приговор.Повторно како добро, примерно и уредно учениче засукав ракави и скроив уште еден приговор. Се смирив и продолжив да користам супер брз интернет. И тоа не е се. Цел ноември се стискав и пазев што симнувам за да не се нервирам повторно со Dial Up и имав некои си 3ГБ. Последните денови од ноември решив да се почастам со некој филм,некој албум и апдејт на неколку програми. Брзината не ми падна и ми рекоа дека не било автоматски намалувањето на брзината т.е. да не се секирам. Со резерва бев но воглавно не се секирав... аха да
Денес ми стигна сметката за Ноември. ШОК!!! Да повторно! Татко ми(екс вработен во МТ) по обичај ми се истури мене...
Еве ја факинг екстра ставката овој месец:
  • Вкупно реализ. ADSL сообр. 5.615,89MB
  • Реализ. ADSL сообр. со доплата 1.519,89МБ
  • Пресмет. единици 3 512,00МB
  • Единечна цена (без 18%ДДВ) 175,00
  • Вкупно 525,00
Тоа е тоа! Сега го пишувам мојот 5 приговор за АДСЛ и оваа тажна приказна. За момент ќе ги заборавев моите среќни мигови со мерачот кој си работеше експоненцијално иако мојот компјутер, лозинка итн. не работеа и пријатните разговори за спомнатото со пријателите од тех. подршка (да ми го задржат малце) упс ми излета...
...немам веќе зборови и нерви за нормално, културно и разбирливо да пишувам...

ПОЗДРАВ
Никола Ѓорѓиевски

13 декември, 2005

Што му фалЕ на интернетот?

На еден пост кај Мијалче се разви дискусија за проблемите со интернетот во Македонија. Мало резиме:
  • потребни се разновидни локални содржини кои би ги привлекле луѓето на интернет (Тони);
  • jас си мрчев за либерализација на мрежите, создавање на алтернативни backbone мрежи од оптиката на МЕПСО и Железница;
  • мора цените да бидат достапни за широките народни маси, а на корисниците да им се понуди поголем избор и фер третман (JS);
  • Јован предложи 5% ДДВ за интерент услугите, инвестирање во мрежата на МАРНЕТ и негово полно вклучување во ГЕАНТ и ИНТЕРНЕТ2 проектите, како и имплементација на националната стратегија и акциониот план (PDF);
  • volan бараше вистинска конекција, а не dial-up фемкање и ја замоли Владата за троа пари за папирите, подобри закони и нивно спроведување.
  • Мијалче ја затвори дебата со предлози за обука по англиски и за употреба на компјутери, популаризација на интернетот, „повеќе блогови, повеќе веб страни, попусти на компјутери од фирми, повеќе кредити од банките“.
Што бурек изедовме. :)

ИНТЕРНЕТ МАКЕДОНИЈА на суд

:) Нит нè тужат, нит тужиме, само стигна решението за регистрација. За да нема забуни - здружението нема да се занимава само со МТ или само со АДСЛ. Цели на Здружението се:
  • поддршка во решавањето на проблемите и заш- тита на правата на интернет корисниците;
  • создавање услови за подобар, попристапен интернет за сите граѓани на Македонија;
  • создавање услови за поголема интернет пенет- рација во Македонија, и
  • промовирање на можности за продуктивна упо- треба на интернет.
Кој сака да се придружи нека прати мејл. Прва активност на здружението ќе биде подготовка на обука за новинари за интернет пристапот и интернет пенетрацијата во Македонија. Обуката ќе се изведува во соработка со Метаморфозис и ќе има за цел да ги запознае новинарите со можностите и проблемите на ова поле, за да може подобро да ја информираат јавноста. Медиумите и до сега ни беа едно од најсилните оружја, а се надевам дека во иднина ќе бидат уште повеќе. Повели ако имаш предлог.

12 декември, 2005

Раздели, па владеј!

Основното правило на „менаџментот“ со робови, и после толку векови, се уште важи на овие простори. На дел од оние што рекоа дека не сакаат АДСЛ dial-up, Телеком им прати новогодишна честитка - сметка со м'сни пенали. Други пак, куртулија од вакво барање да помогнат во полнењето на џепот на кутрите Унгарци и Германци. А да... Да не ја заборавам и нашата Влада и нејзиниот велелепен буџет. Тој е поважен од сè и е веројатно единствената причина зошто постоиме.

Ако доби развод на бракот без последици - честито. Ако не, прати на мејл детали кога и како си раскинал. Од кукање и трпење нема фајде. За да не не сепарираат во различни трла - па така разделени, полесно да не стрижат, музат и колат - треба сите заедно да се ангажираме во АДСЛ антикампања. Јас сум магаренце, а ти?

07 декември, 2005

Инкрементално правопропорционален

Еден многу добар дечко вака го нарече АДСЛ мерачот на МТ. Со други зборови: колку повеќе сркаш, толку повеќе те краде. Како и да го крстиш, останува извор на приказни за во рубрика “Believe it or not!”...или евентуално за “Живот пише драме”. На 1-ви декември ми пиша еден „задоволен“ корисник кој во оо:32 веќе „направил“ 202 МB. Тоа се 860 kbps. Кловновиве од Телеком пак си играат, бидејќи добивам повеќе вакви мејлови.

Петар ми пиша:
На 01.12 во 03:20 го проверив сообраќајот на „мерачот“ и покажуваше 320 МB. Се јавив дента и ми рекоа дека било префрлено од претходниот месец и ќе го средат. На 02.12 пак го проверив, немаше ништо сменето. МB беа покачени. Пак им се јавив, пак рекоа ќе биде денес. На 3-ти истото. Денес 04.12, пак им се јавив и ми рекоа јавете се утре од 8 до 16, па нека проверат. Му викам, на ИГОР беше од МТ, дека ова се случува од 1-ви, ме мотате секој ден, а дечково ми вика “Шо да ви правам, тоа ти е!!!”
Според Никола, мерачот го мрзи да мери, па покажува исти бројки секој месец.
Најново што ми се случи денес на работа, во Бетон-Штип. Имаме офис пакет, ама нешто денес многу споро ми одеше врската, се јавив кај операторите и ми викаат сè е во ред во Штип. Ми текна да проверам проток. Кога го сторив тоа се фрапирав. Имено минатиот месец до 07.11.2005 „имавме“ проток 11234 МB. Сега 12-ти месец, ист датум, ист проток и пак ограничување. Kаква ли случајност или темпиран бројач? Се јавив на 080012345 и таму ми велат, скенирај вирус е. Ајде јас скенирав и ништо. После викат дека имале неколку слични проблеми во Македонија кои наводно биле поврзани со вируси и ги решиле. Ми предложија да ја сменам лозинката и тоа денес го направив. E сега, они треба тоа бројачот да го штелуваат коректно, па тогаш мислам ќе биде во ред.
Има и теории дека мерачот е само програмче за генерирање random number. Според Јован: тоа е кога на 2-ри ќе ви покаже 3 GB, на 3-ти 1, а на 4-ти повторно 3 GB.

Да ги прашам од МТ: Да не треба да го објавиме името на вашиот колега кој вака незгодно го програмира мерачот? Или евентуално името на неговиот шеф?

EDIT: И Владимир има проблем со мерачот. Според она што го напишал мислам дека би го крстил физички-невозможно-прогресивен.

06 декември, 2005

Кревајте бука!

Според вработени во МТ, овие се во хаос во врска со АДСЛ-от. Имаат добиено голем број приговори и известувања за раскинување и самите вработени во правната служба на Телеком признаваат дека со постапките ги имаат сменето условите на договорот. Во моментов се чека одлука од Арбитражната комисија на МТ, која треба да реши што ќе прави во врска со купиштата хартија што ја имаат примено.

Уште се залажуваат дека работите ќе се смират, па прибегнуваат кон курвински тактитки на затворање на салони и непримање на приговори/барања за раскин. Затоа моја препорака: поднесувајте приговори, жалби, барања за раскинување.

Утре ќе поднесам претставка до Државниот пазарен инспекторат за промената на брзината и за нечесност на договорите, заедно со допис кој Организацијата на потрошувачи на Македонија ќе го препрати до Советот за заштита на потрошувачите.

Бројот на нови АДСЛ договори им е многу опаднат и најверојатно нема да го исполнат планот за оваа година. Затоа најважно од сè: објаснувајте на сите што ги знаете дека МТ се лажговци, а АДСЛ-от е жива измама.

05 декември, 2005

Разбудете ги од Агенцијата

Жалба до АЕК за сите што го поднесоа приговорот за намалувањето на брзината. Пожелно е да го поднесат и оние што раскинаа како дополнителна заштита од пенали. Може да се достави денес и утре. Во претходниот пост се дадени приговори на „одговорот“ на МТ.
  1. Прва верзија е за оние што имаат потпишано Барање за користење АДСЛ услуга (тоа е оној документот кој се потпишува пред потпишување на договорот).
  2. Втора верзија е за оние што не потпишале Барање за користење АДСЛ услуга (т.е. оние што поднеле барање по телефон, и не им подметнале да потпишат Барање кога го потпишале договорот).

04 декември, 2005

Несоница

EDIT: Имаше грешка во линкот до приговорите...sorry.

Знам дека е недела, ама брутално ме разбуди еден лилјак... и не знам зошто - одма почнав да мислам на МТ :)

Прашање е колку ова има смисла, но некои луѓе ме замолија па еве... Подолу има приговор на „одговорот“ од МТ, кој е упатен до второстепената комисија на МТ (онаа што му одобри раскин без пенали на Бидик). Има 2 страни и вреди да се проба, ако ништо друго за уште еднаш да им се повтори дека има незадоволни муштерии. Денес или утре ќе бидат објавени и претставки до Агенцијата и Пазарниот инспекторат кои би било добро да ги поднесе секој незадоволен АДСЛ корисник.

Оние што не сакаат да раскинат го поднесуваат како „приговор на одговор“...Оние што пратиле известување за раскинување можат да бираат - дали ќе го поднесат како приговор или ќе бараат да им дадат формулар за раскин на договорот, па во формуларот во делот “Забелешки” ќе напишат дека во прилог доставуваат приговор на поднесено известување за раскинување. Ако тетката не сака да го прими второво, барањето за раскин може да го поднесат во тој салон, а приговорот - истиот ден во друг салон или како препорачано писмо по пошта (и во двата случаи да се назначи дека е за “Арбитражна комисија”).
  1. Прва верзија е за оние што имаат потпишано Барање за користење АДСЛ услуга (тоа е оној документот кој се потпишува пред потпишување на договорот).
  2. Втора верзија е за оние што не потпишале Барање за користење АДСЛ услуга (т.е. оние што поднеле барање по телефон, и не им подметнале да потпишат Барање кога го потпишале договорот).
Двата документа можат да се поднесат во рок од 15 дена од приемот на одговорот. Првите одговори почнаа да стигаат негде на 22 ноември.

01 декември, 2005

Автентичен имиџ

Некои будали на Запад фрлаат дебели пари за да го постигнат ова. Кај нас компанија со 100 милиони евра профит штеди на сè. После трилемата дали АДСЛ момчето е Македонче, Бугарче или Грче, johnnes го актуелизира прашањето: Што има заедничко АДСЛ-от на МТ со българските студенти и со младежките програми за културен обмен? Изгледа цените на Ориндж се исто така високи како на МТ, па истите луѓе се колективно шокирани и на нивниот сајт.

Што следно? Чекам вест дека АДСЛ момчето уствари рекламира хот-лајн услуги во Индија. Хм. Сега ми текна на една фотка од adsl.com.mk каде се гледаа само нозете на тетка на која и паѓа прслучето. Гарант тетката негде ја има цела...онака, ослободена од стегите.

Се менуваат времињата

На времето се велело „Плаши се од Данајците и кога ти носат подароци“. Во овој стил предвременото враќање на АДСЛ брзината извади од памет многу запустени корисници на dial-up АДСЛ. Знаеме дека кога е МТ во прашање секогаш има и бетер...бетер на турски, не на англиски.

Фотка лево: среќен АДСЛ корисник, кој слабо поднесува големи брзини, во афект го гушка мониторот откако видел дека и по крајот на месецот му останала dial-up „брзината“. Среќни- кот е Рубин од Битола, а детали видете тука. Обрнете внимание на брзината на пристап, датумот и времето.

Ете како се менуваат времињата. На времето се викаше „Да даде Господ куќата да ти биде на CNN!“, после Трендо се прослави со честитката до реформаторите „Да даде Господ најблиските и најмилите да си ги бараат по нивните едношалтерски системи“, а сега сме сведоци на раѓањето на уште една модерна клетва: Да даде Господ да склучиш АДСЛ договор!

30 ноември, 2005

Бидна!

Денес во Занзибар...пицеријата де, се одржа основачко собрание на Интернет Македонија. Имаше млади, повозрасни, другари и луѓе што првпат се гледаат во животот. Она што не зближува е интернетот и желбата да се подобрат работите на ова поле кај нас. Целта не ни е да јадеме бурек, туку:
  • создавање услови за подобар, попристапен интернет за сите граѓани на Македонија;
  • поддршка во решавањето на проблемите и заштита на правата на интернет корисниците;
  • создавање услови за поголема интернет пенетрација во Македонија, и
  • промовирање на можности за продуктивна употреба на интернет.
Со мали измени беше усвоен статутот, програмата за дејствување и беа избрани органите на здружението. Јас бев укорен дека многу често сум го користел зборот пенетрација. Од утре ја започнуваме и постапката за регистрација, а првите активности ќе следат кон средината на декември. Здружението ќе може да отвори некои врати кои потешко се отвораат пред поединци и ќе даде поголем публицитет на нашата борба. Ако имаш идеи и волја за нешто да направиш - добредојден си да се приклучиш. Ќе сркаме тоа што ќе надробиме.

29 ноември, 2005

Интернет Македонија

Подготвени се актите на здружението на интернет корисници. Предлог-статутот може да го погледнете тука, каде што може и да се остават коментари за истиот.

Основачкото собрание ќе се одржи утре, 30 ноември, во пицеријата Занзибар, со почеток во 17:00. Сите се добредојдени.

Edit: Подготвена е и нацрт-програма за работа, која може да се види тука. Како и секогаш, коментарите и сугестиите се добредојдени :)

Во Агенцијата сепак не спиеле!

Длабоко се извинувам на Агенцијата за електронски комуникации поради инсинуациите дека не си ја вршат работата. Според Дневник:
Агенцијата за електронски комуникации вчера потврди дека компаниите "Актон", "Балкантел", "Системринг" и "Унифон МК" неовластено прене- сувале дојдовни меѓународни телефонски повици преку СИМ-картички на "Космофон" во мрежите на "Македонски телекомуникации" и "Мобимак" без да склучат договор за меѓусебно поврзување .

Мобилниот оператор "Космофон" добил налог од Агенцијата да ги исклучи сите СИМ картички на овие компании, а против нив ќе бидат преземени сите мерки во согласност со надлежностите од Законот за електронски комуникации.
Од ова се гледа дека Агенцијата е многу ажурна. Барем кога треба да се брани Телеком. Остнува нејасно зошто наведените оператори не можат да склучат договор за поврзување со МТ и Мобимак кога тоа е законски пропишано. Нејасно е и зошто Агенцијата не е олку ажурна во спроведувањето на законот во случаите кога истиот во континуитет го кршат МТ. За потсетување за Агенцијата, според законот:
  • Договорите за АДСЛ се незаконски затоа што со нив не почитува одлуката на Монополската управа од 15.3.2004.
  • Со договорите и постапките на МТ се крши став 1, точка ѓ, како и став 3 на член 96 од Законот за електронски комуникации.
  • МТ го крши член 117 од Законот.
  • Договорите се нечесни.
  • Намалувањето на брзината на ниво на dial-up е спротивно на договорите, понудата на брз интернет и рекламите за таа понуда.
  • Дискутабилна е точноста на мерењето на интернет сообраќајот, а МТ не дозволуваат проверка на истото.
Бидејќи горниве прекршоци слабо ги гледаат, останува мојот предлог до Агенцијата и нејзиниот основач истата да се прекрсти во Агенција за монополски комуникации.

28 ноември, 2005

Имаме име!

Во врска со идејата за формирање на здружение за заштита и промовирање на интересите на корисниците на интернет, беше одржано гласање за име преку форумот и yahoo групата.

Резултатите се следни:
  1. Интернет Македонија - 46.66% (14 гласа)
  2. Интернет за сите - 26,66% (8 гласа)
  3. Здружение на интернет корисници - 10.00% (3 гласа)
  4. Интернет НВО - 10.00% (3 гласа)
  5. друго, ќе пратам на мејл - 6.66% (2 гласа)
Јован убаво кажа:
Според тоа, го прогласувам името на здружението на граѓани: Интернет Македонија. Нека и е со среќа интернетот на Македонија!

Зошто е телефонот скап?

О: За да не го користите без врска. Разорните последиците од имањето бесплатен телефон се согледуваат по постапките на Боргите од МТ. Тие не го плаќаат телефонот, па времето си го пополнуваат со правење глупи повици.

Во последните неколку дена, некои од оние што поднесоа известување за раскинување на АДСЛ договорот добија ултимативен повик од Телеком, да изберат еден од пакетите: со доплата или со намалување на брзина. Наместо „You will be assimilated“, овие извикувале: „Морате да одите до салон за да склучите нов договор.“ Делот со „Resistance is futile“ се подразбира.

Следниот пат кога ќе ве репнат со астрономска сметка за телефон, место да пцуете, веднаш да му се заблагодарите на Телеком. Ви мислат добро. Не сакаат да се бламирате со непотребни повици.

23 ноември, 2005

Хартијата трпи сè!

Free Image Hosting at www.ImageShack.usВчера почаа да стигнуваат одговорите од МТ на вториот бран приговори и на известувањата за раскинување на договорите за АДСЛ услуга. Сега душичките од МТ се помачиле да срочат писмо од цели две страни, а се потрудиле дури и да го вметнат името на корисникот, бројот и датумот на поднесениот приговор/известување. Тука е првата, а тука втората страна.

Единствена фалинка е што комплетно ја утнале темата. Приговорите/известувањата се однесуваа на:
  1. Намалувањето на брзината на ниво на dial-up;
  2. Проблемите со мерењето на сообраќајот и проверката на точноста на истото;
  3. Неквалитетот и прекините на услугата, како и недавањето компензација за ова.
„Одговорите“, потпишани од Анче Тодоровска, се однесуваат на тоа дека МТ има право да ја намалува брзината. За втората и третата точка, нема ниту збор. Ако прочитаа што пишува во приговорите/известувањата, ќе видеа дека правото на намалување не се оспорува, туку се оспорува нивната постапка во која рекламираат и склучуваат договори за брз интернет пристап, а испорачуваат пристап со dial-up брзини.

Интересно е што „одговорот“ е ист и до оние што поднеле приговор и до оние што поднеле известување за раскинување. Повторно не го почитуваат член 96 од Законот за електронски комуникации и еден куп други. Ќе има нова тура жалби до Агенцијата, приговори за оние кои сметаат дека тоа има некаква смисла... Пријавените за тужба се поделени на две групи: едни ќе бараат намалување на прифатлива брзина или поништување на договорите, други ќе бараат да не им се наплатат пенали за веќе раскинатите договори. За подетални информации на bez_vrska@hotmail.com.

22 ноември, 2005

Македонче ли е, Б'лгарче ли е?

Ако си корисник на АДСЛ, можеби како home page ја имаш ставено adsl.com.mk. Страната е да ти се качи притисок, ама со „неограничениот“ интернет од МТ мора стално да си на штрек во исчекување на dial-up „брзини“. За сите на кои им збоктисало момчето кое го гушка мониторот и сакаат да му ја пукнат една, еве корисна информација - момчето може да е Б'лгарче.

На 7 ноември во Софија се отвори голем продажен салон за компјутерска опрема на грчкиот ланец Мултирама, кој е дел од Германос. На сајтот и на промотивниот материјал фигурира добро познатата фаца.

Ало, Телеком, дали вие сте краделе или вас ве крадат? Ако е второво, баш ми е мило! Да видите и вие како е.

Државните органи велат: „Ние не сме одовде!“

Во врска со обвинувањата од ЕУ дека Владата ја спречува либерализацијата на пазарот за електронски комуникации, стигна демант од Министерството за транспорт и врски. Демантот воопшто не негира дека либерализацијата е закочена, туку вината за тоа ја префрла на Агенцијата за електронски комуникации! Агенцијата била независно тело и одговaрала пред Собранието, а не пред Владата. Комедија! Јас го прашувам Министерството: Пред кого одговараат четворицата претставници на Владата во Одборот на директори на Телеком, меѓу кои се и неговиот претседател и потпретседател? Дали овие лица изгинаа во борбата за либерализација на пазарот, па сега ги нема ни глас да им се чуе?

Владата безуспешно се вади од нешто во што е до гуша заглавена, на што посочува и отсуството на реакција од Државниот пазарен инспекторат, орган во склоп на Министерството за економија. За потсетување, Организацијата на потрошувачи на Македонија пред скоро месец и половина поднесе претставка до Инспекторатот со која бара да се истражи незаконитоста и нечесноста на договорите за АДСЛ услуга. Министерството за економија пак, се обврза дека Бирото за метрологија, кое е во склоп на Министерството, ќе испита дали мерачот на интернет сообраќај на МТ ги исполнува условите предвидени со Законот за метрологија. После повеќе од еден месец, нема никаков одговор. Овие работи не се директно поврзани со либерализацијата на пазарот, но јасно укажуваат на привилегираниот третман кој му го дава Владата на доминантниот играч на пазарот.

Отсуствува реакција од уште еден „независен“ државен орган - Комисијата за заштита на конкуренцијата - и покрај фактот што неговиот претходник (Монополска управа) утврдил дека Телеком ја злоупотребува доминантната позиција на интернет пазарот. Одлуката од 15.3.2004, наложува Телеком да им дозволи на другите провајдери да нудат АДСЛ услуга преку неговата мрежа, а во меѓувреме забранува МТ да ја рекламираат и продаваат истата. Ваквата одлука е потврдена и од Министерот за економија, кој ја одбил жалбата на Телеком. МТ, и после дваесет месеци, продолжуваат да ги условуваат другите оператори дека ако сакаат да ја користат нивната мрежа мораат во пакет да платат и за интернет пристап. Ваквите услови не може да ги прифати ниеден провајдер, зошто со нив малопродажните цени би биле и до 20% повисоки од оние на Телеком.

Е сега, ако и Агенцијата за електронски комуникации и Комисијата за заштита на конкуренцијата не се одовде, се поставува прашање од каде е Собранието на РМ кое ја контролира нивната работа (or lack thereof, разбира се)? Не заборавете ова прашање да му го поставите на вашиот пратеник, кога ќе дојде да држи митинг за реизбор.

21 ноември, 2005

„АДСЛ или како не пљачкаат?“

Голем дел од АДСЛ корисниците имаат по некоја хорор приказна за мерачот на АДСЛ сообраќај. Де брои наназад, де покажува сообраќај кој е физички невозможно да се направи во одреден период, де воопшто не брои... Неограничени можности - абе, the sky is the limit!

Најзасегнати од ваквите „испади“ на мерачот, се ретките корисници кои се префрлија на пакетот со доплата за задржување на брзината. Очекував, следниот месец, заедно со сметките да стигнат лелекања и пцовки од нив - упатени на позната адреса. Не ми падна на памет дека реакциите може да дојдат и порано и да бидат поврзани со други, побазични проблеми.

Во денешен Дневник е објавено писмо од Николче Милошев, корисник на АДСЛ услуга:
...Сакајќи да придобијат што поголем број на корисници МТ-нет делеа пакети ветуваа брзини и триста чуда. Се си беше фино додека не им "светна сијаличето" дека како монопол може да не дере. Малку им беа тие 2.900 денари за договор на неопределено време, воведоа и доплата за надминатата сума од 4ГБ. Немаше друго чаре ајде и тоа го проголтавме (сакаш иста брзина над 4ГБ ќе си доплаќаш). Е арно, ама и тука имало глупости и "недоразбирања". Склучив договор за задржување на брзината бидејќи знаев дека каде и да е до половина месец ќе го надминам лимитот. И така договорот склучен на 1.11.2005 година господата од МТ-нет не успеале да го прочитаат до 14.11.2005 кога така "пријатно" ме изненадија со враќање на брзината како при Dial-Up врска. Кога се јавив знаете што ми рекоа?

"Господине, па вие сте склучиле договор напишан на рака, ние немавме отпечатено таков договор навреме." Јас сум бил виновен што така совесно и навреме сум сакал да го остварам тоа за што сум потпишал договор.

Кога им реков да ми ја вратат брзината тие фино ме информираа дека најдоцна за еден ден (15.11.2005) ќе ја вратат брзината и дека МНОГУ ИМ Е ЖАЛ АКО СУМ БИЛ ОШТЕТЕН НА НЕКОЈ НАЧИН. Она што најмногу ме иритира во сето ова е текстот на договорот кој е склучен и според кој КОРИСНИКОТ т.е. јас (и сите обични смртници како мене) МОРА да плаќаат ПЕНАЛИ како тие си ги нарекуваат доколку не се придржуваме кон договорот. Е па сега дали МТ-нет е подготвен да плаќа пенали затоа што не се придржува кон договорот. За крај само да кажам дека искрено се надевам оти некој од одговорните во МТ-нет е доволно писмен и ќе успее, ако не договорот, барем ова писмо да го прочита и да се замисли малку дали им одговара ваква слава.

18 ноември, 2005

Competition...is the only solution!

Пред некој ден рчкав по он-лајн архивите на македонските весници и го прочитав следното: „Застапеноста на Интернет во Македонија не е 2, туку 4 отсто. Состојбата и не е така лоша, подобра е отколку во Албанија, Романија и во Босна и Херцеговина“ - велат во телекомот. Текстот е од јули 2004 година, после поскапувањето на телефонските импулси, а темата - скапиот интернет.

Не ги сакам американските митови, уште помалку нивните претседатели, ама сега ќе цитирам еден од нив: „Конкуренцијата не е само основа за заштита на потрошувачот, туку е и поттик на прогресот.“ Превртено наопаку: жртви на недоволниот обем на конкуренција не се само потрошувачите, туку уште поважно - прогресот.

Првиот цитат е доказ за ова. Доминантиот играч на пазарот, со помош на наследената инфраструктура, обилни извори на приходи и надмоќта врз регулаторните органи создава бариери кои ги осакатуваат конкурентите и кои спречуваат влез на нови играчи. Последниве се неопходни за динамизирање на секторот, кој е од суштинско значење за развојот на економијата и општеството.

Државата со својата слабост и тромост е главниот соучесник. Како приоритети во областа на информационото општество, на кои треба да работиме во наредните 1-2 години, ЕУ ги наведува:
  • Да се прекине кршењето на Договорот за Стабилизација и асоцијација преку преземање на сите неопходни мерки за исполнување на обврската за либерализација на секторот за електронски комуникации, вклучувајќи и усвојување на сите подзаконски акти и натамошно зајакнување на регулаторните тела.
  • Да се обезбедат механизми за заштита на конкуренцијата од оператори со значајна пазарна моќ.
Подетален преглед на гледиштето на Европската комисија, со нагласени интересни делови, може да се најде на блогот на Јован. Верувам дека прогресот ќе го осетиме само кога ќе се раскине неприродниот брак.

Првична средба

Вчера, во Скопје, се одржа средба на која се разговараше за идејата за создавање на здружение за заштита и промовирање на интересите на интернет корисниците. Состанокот започна со кратко запознавање и заклучок дека се работи за прилично шарена дружина во поглед на возраст, струка и животно искуство, обединета со еден заеднички интерес.

Беше утврдена општата цел на идното здружение: создавање можности за подобар интернет пристап во Македонија. Основен начин преку кој ќе се работи за остварување на таа цел е преку развивање на отворен и конкурентен пазар на интернет пристап, во кој корисникот ќе има избор и ќе се почитуваат неговите права. Здружението за остварување на своите цели ќе соработува со сите државни органи и со провајдерите на услуги, но ќе применува и разни облици на притисок. Средствата за вистинска либерализација на пазарот се во рацете на државните органи и затоа таму треба да бидат насочени најголем дел од активностите на идното здружение.

Договорено е во наредните неколку дена, преку отворената yahoo група, да се искристализираат целите и задачите, статутот и програмата за работа. Ова е неопходно за да може да се закаже основачко собрание и да се отпочне процесот на регистрација. Статутот треба да содржи механизми кои ќе обезбедат зачувување на автентичната идеја на здружението и ќе спречат тоа да потпадне под влијание на политичките партии, провајдерите и донаторите.

Здружението ќе има легитимитет и ќе даде резултати само ако постигне масовност и медиумска експонираност. Затоа, потребни се идеи за начинот на популаризација и привлекување на членови.

17 ноември, 2005

Непенализирано раскинување на договор

Денеска, Бидик на својот блог го објави писмото што му пристигна од АД „Македонски телекомуникации“, во кое го известуваат дека му одобруваат раскинување на договорот без плаќање на пенали. Бидик целиот процес убаво го објаснува на неговиот блог.

16 ноември, 2005

Здружение на интернет корисници

Free Image Hosting at www.ImageShack.us Заинтересираните за создавање на здружение за заштита и промовирање на интересите на интернет корисниците се покануваат на средба во пицеријата Занзибар (карши Градскиот парк во Скопје), на 17 ноември (четврток), во 14:00. Слика од околината на местото за средба е ставена лево. Кликнете за поголема верзија.

Breaking news на CNNN!

Во ноември нагло пораснале расправиите во македонските домови, а богами и влезови. Се фаќале за гуша брат со брат, мајка со ќерка, први комшии и функционери во куќните совети. Репортажата на Кристијан АМАНпараспур открива дека главен фактор за ваквиот братогушечки феномен било прашањето за правичната застапеност во размената на битови и бајти двонасочни нежности во склоп на АДСЛ врската.

Од Монополски телекомуникации ltd. категорично негираат дека оваа мода се должи на новододадената кратенка - со значење limited - во нивното име. Портпаролот на компанијата, Небулоза ЊЕТкова, изјави дека се работи за инсинуации од една мала група мазохисти кои секој месец им донираат по 40 евра, чисто за да си го овозможат задоволството после да ги оговараат. Соочен со остриот поглед и бушавиот микрофон на АМАНпараспур, портпаролот призна дека слични работи се случувале и после порастот на цената на телефонските импулси за над 300%, но додаде дека и тогаш ситацијата набрзо се нормализирала. Портпаролот не знаеше да појасни дали нормализацијата била некако поврзанa со наглиот подем на побарувачката за голуби писмоносци.

Во потрага по вистината и малку кафе, АМАНпараспур храбро потрча кон Владата на малата Патлиџан република, но таму и кажаа дека сите релеватно нерелевантни фактори се отидени во Адис Абеба на рибање. Имено, Комисијата на Афричката Унија, каде Република Патлиџан аплицира за членство, била незадоволна од тоа што Владата не ги послушала советите да го продолжи монополот на Монополски телекомуникации ltd. до 2205 година и наместо тоа го продолжила само до 2105. Афричката унија смета дека ваквото однесување на Владата е пречка за забрзаното приближување на земјата кон црниот континент. Препорака на Комисијата е Владата итно да докупи уште акции во Монополски телекомуникации ltd. Унијата утврдила дека сегашните 47% се недоволен поттик за поактивно вклучување на државните органи во сузбивањето на слободниот пазар - оценет како најголем непријател на забрзаното зацрнување на локалната економија.

Следната дестинација на АМАНпараспур е Агенцијата за монополски комуникации, која ги благословила АДСЛ врските по што престанала да контактира со младенците. Таму изјавија дека се зафатени со подготовка на Правилникот за бесконечно развлекување на примената на законите и ја замолија да не им го нарушува кафето. После мала пауза за поправање на шминката, АМАНпараспур бескомпромисно поита кон Државниот инспекторат за борба против слободниот пазар, но сите ненадлежни фактори ги затекна во дремка. Тоа не ја спречи во неврзан муабет со дежурниот записничар, чистачката Цвета Трачева, да дознае дека тоа е само генерална проба пред стапувањето во зимска хибернација. Комшиите, израдувани од неочекуваната можност за фаќање сеир, ја советуваа да проба повторно напролет.

Обидите да контактира со некој од групата задавени АДСЛ корисници се покажаа безуспешни. Според врвни експерти консултирани од CNNN, обидот за комуникација со лица со dial-up брзини, дури и да е теоретски возможен, е непотребно губење време и може да нанесе тешки последици по менталното здравје. Други, помалку врвни експерти, блесаво констатираа дека со тоа што АДСЛ корисниците меѓусебно се задавиле - проблемот се решил сам од себе. Критичкото око на АМАНпараспур тука ја позна уникатната способност на Владата и Монополски телекомуникации ltd. за креативно менаџирање на кризите преку кревање на рамениците и правење на Тошо. Непогрешливиот АМАНпараспур заклучок е дека малата Република Патлиџан ги помина најголемите искушенија и благодарение на неодоговорноста и некомпе- тентноста е повторно лидер во регионалната салата и успешна приказна во афроинтегративните процеси. (Преземено од CNNN)

15 ноември, 2005

Ноемвриско резиме

После сите „проверени информации“ дека МТ нема опрема да ја намалува брзината, овој месец ни ги донесе долгонајавуваните dial-up брзини. Месецот не тргна многу добро ни за МТ, каде што најавите за нови отпуштања доведоа до протест на оние што добија шут карта и забрана за штрајк. Малите отстапки од МТ како да стануваат традиционални, па сега стигнаа во вид на писма со кои ги известија дел од корисниците дека им е одобрено раскинување на договорите без плаќање пенали. Следеа нови приговори, жалби и известувања за раскинување на договорите и нормално - нови закани со пенали.

Во овој момент, раскинувањата на АДСЛ договорите и приговорите се споредна работа за менаџментот на МТ, но сепак ги принудија повнимателно да не чујат. Дел од забелешките, кои незадоволните АДСЛ корисници ги изнесуваа минатите месец и пол, се споделени со врвниот менаџмент на МТ. Останува да видиме колку тие ќе умеат да ги искористат овие сознанија - за нивно и наше добро. Доминантната позиција на Телеком на интернет пазарот е неспорна. Неспорни се и високите цени, незадоволството од нивните постапки, како и фактот дека Македонија е на дното во Европа по стапката на интернет пенетрација. Во наредниов период, Македонски телекомуникации треба да решат дали ќе ја поведат Македонија кон Европа, или ќе продолжат да бидат најголем кочничар за нашето поврзување со светот.

Нашиот проблем не беше толку присутен во јавноста во последно време, но се работи ова да го смениме во наредните недела-две и да актуелизираме некои теми за кои МТ не сака да се зборува. Паралелно со тоа ќе продолжи и анимирањето на странските фактори - овојпат на друго ниво.

На друго поле, се разработи Форумот р-Еволуција, како место каде АДСЛ корисниците ќе може да разменуваат предлози и мислења за натамошните активности. Бидејќи постапките на конкуренцијата не влеваат надеж дека учат од грешките на МТ, форумот има за цел и да ги прибере информациите и искуствата за понудите на широкопојасен интернет пристап, како и да собере идеи за можностите за подобрување и дополнување на постојната понуда.

Оние што не се чувствуваат удобно на форумот, или што не веруваат дека е обрнато внимание на нивните идеи (оставени преку коментарите), можат истите да ги пратат на predlozi@gmail.com. Линк до мејлот е ставен на менито десно (ПРАТЕТЕ СВОЈ ПРЕДЛОГ!). На овој начин и ние ќе имаме подобар преглед на различните предлози, за да не се случи некој да го запоставиме. Aдмините на р-Еволуција ќе ја поддржат секоја идеја и активност која може да даде резултати.

Сосема е демократски да имаме различни мислења, ставови и начини на реагирање, но не смееме да зборавиме дека имаме една заедничка цел: подобар интернет пристап. Секој се бори за тоа на свој начин и со средствата што му се на располагање. Телеком игра на картата дека ќе се замориме и ќе се искараме меѓу себе. Дали ќе успее оваа византиска тактика, зависи само од нас.

Edit: А1 објави вест што индиректно е поврзана со нашиот проблем. Бидејќи Телеком има монопол во фиксната телефонија, должен е својата инфраструктура да ја понуди по пазарни цени на други компании кои сакаат да нудат услуги преку истата. Сте се запрашале зошто ниту еден друг провајдер во Македонија не нуди АДСЛ? Токму поради одбивањето на Телеком да ја исполни оваа своја законска обврска. Државата мудро си молчи. Толку мудро што најавен е и жолт картон од Европската комисија.

08 ноември, 2005

Ајмо, тазе жалби, приговори и барања за развод!

Навали народе! Нова рунда АДСЛ зарзават. Како што ветив - еве жалба до Агенцијата за електронски комуникации која може да ја пополнат и поднесат оние што го поднеле првиот приговор од блогот р-Еволуција и форумот Багра (објавен на 9.10.2005). Има две верзии:
  1. Прва верзија е за оние што имаат потпишано Барање за користење АДСЛ услуга (тоа е оној документот кој се потпишува пред потпишување на договорот).
  2. Втора верзија е за оние што не потпишале Барање за користење АДСЛ услуга (т.е. оние што поднеле барање по телефон, и не им подметнале да потпишат Барање кога го потпишале договорот).
Адресата на агенцијата е: Агенција за електронски комуникации, ул. Даме Груев бр.1, 1000 Скопје. Поднесувањето може да биде лично за што ќе ви требаат два примерока (едниот да им го дадете, а на другиот да ви удрат штембил и да си го задржите), а може и да ја пратите како препорачано писмо во еден примерок. Притоа како прилог може да доставите и копија од Договорот и копија од првиот приговор.

Ако поради неисполнување на брачните обврски сакате да се разведете од МТ, откога ќе ја поднесете жалбата до Агенцијата, пополнете и поднесете до Телеком известување за раскинување на АДСЛ договорот. Известувањето може да го поднесат и оние кои веќе раскинале, но се плашат дека ќе им наплатат пенали. И од известувањето има две верзии:
  1. Прва верзија е за оние што имаат потпишано Барање за користење АДСЛ услуга (тоа е оној документот кој се потпишува пред потпишување на договорот).
  2. Втора верзија е за оние што не потпишале Барање за користење АДСЛ услуга (т.е. оние што поднеле барање по телефон, и не им подметнале да потпишат Барање кога го потпишале договорот).
Известувањето може да го поднесете лично во продажен салон (еден примерок за нив и еден за вас на кој ќе ви удрат штембил) или како препорачано писмо (еден примерок) на позната адреса: АД „Македонски телекомуникации“, ул. „Орце Николов“ бб, 1000 Скопје. Ве советувам известувањето да го поднесете најдоцна до крајот на работно време на 12 ноември.
ВАЖНО 1: Може да се случи модемот да не ви го деинсталираат со недели и после да сакаат да ви наплатат за тој период. Затоа ако го поднесувате известувањето во продажен салон, земете го модемот под мишка и на лице место плеснете им го у фаца (модемот де :). ОБАВЕЗНО барајте документ, со потпис и печат, дека сте им го дале модемот за да не се случи после пак да ви го бараат! Нели, се работи за гадови.
ВАЖНО 2: МТ нема да има правна основа да ви наплати пенали, но веќе знаете дека „МТ - и се е можно“. За екстра претпазливите во понеделник ќе биде објавенa и втора жалба до Агенцијата за електронски комуникации. Оваа ќе може да се поднесе и по раскинувањето на Договорот.
ВАЖНО 3: Доколку го поднесувате известувањето за веќе раскинат договор, на првата страна кај „Корисникот го смета договорот за раскинат на [ДЕН/МЕСЕЦ/ГОДИНА НА ПОДНЕСУВАЊЕ НА ИЗВЕСТУВАЊЕВО]“ место датумот на поднесување на известувањето ќе го ставите датумот кога сте поднеле барање за раскинување.

На оние што од верски причини не сакаат да го раскинат договорот, туку сакаат да поднесат нов приговор до МТ заради намалување на брзината, им требаат следниве документи:
  1. Прва верзија, погодувате, е за оние што имаат потпишано Барање за користење АДСЛ услуга (тоа е оној документот кој се потпишува пред потпишување на договорот).
  2. Втора верзија е за оние што не потпишале Барање за користење АДСЛ услуга (т.е. оние што поднеле барање по телефон, и не им подметнале да потпишат Барање кога го потпишале договорот).
Игор од Скопје беше љут што поднел три приговора до Телеком, а тие не му одговориле соодветно ниту на еден, па ми прати приговор кој го составил во врска со ваквиот безобразлук на МТ.

Епа, среќно пополнување Razz

Edit 1: Малку е средено форматирањето и поправени се грешките.
Edit 2: Ако во вашето сандаче стигнало писмо од Телеком, потпишано од Анче Тодоровска, може да и се заблагодарите на Ance.Todorovska@mt.com.mk. Бидете фини :)

06 ноември, 2005

р-Еволуција Форум

Во очекување на сајтот што го најавивме веќе неколку пати, а и поради полесно, попрегледно и подобро комуницирање меѓу посетителите на блогот, почна со работа форумот р-Еволуција. Сите конструктивни, креативни, дефетистички, критички коментари, предлози и идеи ќе може да ги пишувате таму.

ПОТСЕТНИК: Како што спомна Александар З. во еден од коментарите на претходниот пост, се наближува 14-ти ноември - последниот ден за законско раскинување на договорите за ADSL.

Адресата на форумот е: http://revolucija.forumer.com/

03 ноември, 2005

Сакате подобар интернет? Кажете како!

Еве можност да ги искористите своите креативни способности и да понудите некоја супер р-еволуционерна идеја. Како до подобар АДСЛ? Како до подобар и поефтин интернет? Како до навистина брз интернет? Како интернет корисниците во Македонија веќе да не бидат стрижени? Молам за одговори. Знам дека ги имате.

Што ни треба? Кампања против монополот на МТ? Бизнис план за МТ во кој ќе им нацртаме како да ја подобрат услугата и да привлечат нови корисници, наместо што ги губат постојните? Ајде Атила ве повикува: Explain it to me like I'm a five year old. Кажувајте што би сакале да видите и како тоа може да му го продадеме на МТ. Што треба: локален веб proxy, flat rate пакет, исправен мерач, пониски цени, побрз и бесплатен локален сообраќај? Јас знам дека сите го сакате ова, но кажете како да ги убедиме МТ дека тоа ќе биде и во нивна корист.

Оние што мислат дека треба бескомпромисно да се удри по МТ, подгответе идеи за анти-АДСЛ сајт. Ајде уметнички души изработете банери кои потоа ќе ги објавуваме на разни страни со линк до блог-ов или до анти-АДСЛ сајтот. Подгответе креативни пораки и флаери кои ќе се делат низ Македонија. Споделете ги со нас, фотокопирајте и делете ги по маало и оставајте ги по сандачиња. Јас ветувам дека ќе ви помогнам. Оговарaјте го АДСЛ-от кај сите што ги знаете. Досадувајте им со вашите проблеми на новинарите. Досадувајте им на луѓето од 0800, тие се таму заради вас, искористете го бесплатниот телефон :)

Оние што мислат дека не треба да се мава само по МТ, туку по сите провајдери, повелете со иницијатива за сајт каде ќе се споредува понудата на интернет во Македонија. Мора да постојат јунаци кои ќе помогнат за такво нешто. Нека има на исто место услови, цени, споредби и искуства со провајдерите од цела Македонија, за секој да може да види што е најдобро за него. Да не рече после некој дека не му кажале се кога склучувал договор.

Оние што мислат дека треба некоја институција која ќе не штити нека кажат која. Како да се разбудат државните органи? Како да направиме нашите проблеми да ги засегаат и нив? Дали е потребно здружение на интерент корисници? Како да се формира? Како да се организира? Како да се финансира? Како да не биде само уште еден клон на Сорос?

Сите идеи од „јавниот конкурс“ ќе бидат сумирани и објавени на блогов. Награди не делиме, доволна награда ќе биде ако се избориме за подобар интернет. Внимавајте! Прашањето не е што не треба, туку што треба да се прави и дали сте спремни да го направите тоа. Прашањето е многу едноставно: Со какви идеи си ти? Повели, светлото е на тебе.

Како изгледа dial-up „АДСЛ“?

На многу од луѓето што го посетуваат блогов не им беше јасно каков е тој АДСЛ со dial-up брзини. Се до вчера не ми беше јасно ни на мене кога добив порака од Наско Стојановски од Струмица. Наско е меѓу првите корисници на АДСЛ уште од 20.1.2004 година. За да го награди за ова, Телеком му пратил сметка за март 2004 во која покрај АДСЛ претплатата му биле вклучени и телефонски импулси за користење интернет. Погодувате, Наско не ја платил сметката.

Free Image Hosting at www.ImageShack.usНе сакајќи да го прават овца, тој побарал испис за телефонскиот сообраќај кој го товарат дека го направил во спорниот месец, но од Телеком наместо испис му дале тужба. На исписот прикажан лево, кој му го дале дури на судењето пред 4 дена, се гледа дека Наско многу љубел да воспоставува dial-up конекција со интернет. АДСЛ-от веројатно го чувал за украс, или можеби човекот едноставно не поднесувал добро големи брзини. На сликата е подвлечено колку е Наско педантен, па воспоставувал dial-up конекција секој ден во едно исто време (до секунда) и секогаш трошел ист број импулси. Од Телеком, соодветно педантно, за интернет импулсите му пресметале долг од 19 634,64 денари. Кога на ова ќе се додаде 18% ДДВ сумата е 23 168,88 денари. Претплатата за АДСЛ е црешичка на претходнава сума.

Сите кои не веруваа дека е можно да платиш АДСЛ, а да добиеш dial-up имаат уште еден доказ дека важи паролата „Телеком и се е можно!“. Феноменалната понуда, со која добивате две во едно, се вика dial-up „АДСЛ“. Да живее Телеком!

Разгледување на идеите

Во вжештената дискусија што се разви во коментарите на претходниот пост паднаа, барем за мене, тешки обвиненија. Дозволете да објаснам зошто некои работи не се како што изгледаат на прв поглед и да го образложам мојот став по толку спомнуваниот „долг коментар“.

Vaka dirigirano gi terame ludjeto da raskinuvaat dogovori, Zosto i koja e alternativata koja im ja nudime na tie ludje????? Ili toa ne si se zaprasal. Pa ova go svedovme samo na toa da bide protiv telekom na sekoe nivo, a ne kako bitka za podobar internet.

Никој не ги тера луѓето да раскинуваат договори, туку оние што сакаат да ги раскинат. Зарем некој може да те натера да направиш нешто што не сакаш? А, како што кажа bezvrska, никој од нас не е провајдер за да им понуди алтернатива. Борбата никогаш не била за наоѓање алтернатива туку за опстанок на оној флет-рејт што го имавме до скоро.

Сепак, да. Ова прерасна во борба против Телеком. Јас бев прописно изваден од такт од ставот и постапките на Телекомци:
  • „Пушти ги децата, нека си играат“
  • „Ние го имаме најточниот мерач во државава“
  • „Доколку е злоупотребена некоја лозинка тоа е затоа што корисникот ја дал на некој друг“
  • „Целава ситуација беше поттикната од некои конкуренти“
  • „Проблемот е во вас, не нас“
Една работа да разјасниме, повлекувањето на одлуката за наплата по симнат килобајт не беше затоа што од еднаш се сетиле АД „Македонски телекомуникации“ дека направиле грешка, туку само и САМО поради револтот на корисниците и подготвеноста да се раскинат договорите. Новата промена не е ништо поарна од претходната, но многу луѓе „се помирија со судбината“ и веќе не ги засега понатаму состојбата.

Bitka koja oni ja dobivaat i na kraj ke ja dobijat. Nastapuvame neorganizirano, na uraaaa, dolu telekom itn itn. Realnata sostojba e sosema druga i ti toa go znaes, kakva ke bide nikoj ne znae. Ne znam zosto se pritiskaat ludjeto da gi raskinuvaat dogovorite sega. Sega i nemame nikakvo baranje do niv. Ke gi raskineme dogovorite i ke go izgubime najsilnoto oruzje so koe do sega gi dobivme dvete bitki, otkazuvanjeto na dogovorite.

Не е точно дека МТ ќе ја добијат битката на суд.

За неорганизираноста до некаде се сложувам. Но обидете се да сфатите дека првите два пати кога имаше најава за некаков протест се појавија 30-тина (горе-долу истите) луѓе. Ако имате идеја како да се анимираат и активираат СИТЕ (или барем 30%) корисници, слободно кажете.

Проблемот со раскинувањето на договорите е едноставен (барем според мене): Ние сите го гледаме она Македонски во АД „Македонски телекомуникации“, заборавајќи дека тие одговараат на „виша сила“ (во овој случај Дојче телеком преку Унгарскиот телеком). Ако се повеќе корисници се откажуваат од услугата за која Мактел (т.е. Дојче телеком) има монопол, тоа ќе активира аларм некаде во Германија (бидејќи тука, очигледно, тоа не успева). Точно е дека раскинувањето на договорите е најмоќното оружје што го имаме, но ако не го употребиме ќе останеме поразени со парче хартија во рацете.

Hipoteticki ke gi raskineme so telekom dogovorite ke si potpiseme site so nekoj drug i toj ke ne ebe kako i telekomot, telekomot ke si najde novi korisnici vaka ili onaka, zosto na site ni trebe internet i sto napravivme so REVOLUCIJATA. Pa so toa sto sega ke se raskinat dogovorite nema da dobieme podobri uslovi.

Друг провајдер нема да може да не стриже. Еднаш истрижана овца не може да се стриже повторно истиот ден.

Подобри услови од АД „Македонски телекомуникации“ нема да добиеме. Да, тоа е мое мислење, но сепак тврдам дека е издржано: Нив им требаат (вкупно) 10.000 корисници до крајот на оваа година. Целта им е да ги намамат со Старт пакетот, чија цена (но не и услови) се создадени да ги намамат неупатените сопственици на компјутери. Условите на Старт пакетот некој во МТ ги видел како одлична идеја како да се исцицаат повеќе пари од останатите корисници. Да, си ја повлекоа таа одлука, но намалувањето на брзината е (до некаде) и полошо од проста причина што никој од нас нема потпишано договор за dial up врска. Во случај да сакаме да си ја искористиме брзината загарантирана со договорот, ќе мора да ДОПЛАЌАМЕ за секој симнат килобајт. Верувам дека ќе има и такви корисници (како што кажа некој во коментарите на претходниот пост, со опцијата за наплаќање по симнат килобајт, Телеком ќе создаде нова група корисници која ќе наплаќа за нијанса повеќе од нивната цена за оние 512 мегабајти).

Trebase da se soberat site onie koi sakaat da go raskinat dogovorot pa so eden pismen ultimatum potpisan od site, da se otide do telekom i da se bara podobar internet, do definicija sto nie smetame deka e dobar internet i sto smetame deka e fer ponuda. Samo togas ke gi nateravme da razmislat i mozebi samo mozebi ke uspeevme da dobieme podobra ponuda.

Проблемот е двоен тука: не може да се соберат од еднаш сите што сакаат да го раскинат договорот, а писмениот ултиматум ништо немаше да смени. Впрочем, приговорите што беа поставени на блогот и беа ултиматуми. Тие размислија и ете што излезе. Ставот на Телеком е дека флет-рејт пакет не може да има затоа што би бил „едноставно прескап“. Што е апсолутно неточно, посебно имајќи предвид дека во последните 2 години имавме токму флет-рејт ADSL. Сепак, ставот на Телеком е таков каков што е.

Vaka ke gi raskineme dogovorite i sto ke im ponudime na site tie sto gi raskinale, 1000 den za sekoj mega kaj Onnet ili p2p ogranicuvanje kaj kabelskite ili ne znam sto drugo, koe i ne e podobro od ova sto sega go imame a realno i neznaeme dali posle prvite 4gb ke prekine ili ke ostane.

Единствен некој што може нешто да им понуди на корисниците се интернет провајдерите. А за прекинување по тие 4GB, ќе го има. Како што спомнав во еден претходен пост, предвидувано било и дополнително ограничување од +2GB, по кои ќе се намали брзината на „технички неупотреблива брзина“.

Dogovorite bea za zal naseto oruzje

Ќе повторам: Тоа е апсолутно точно. Но на „улиците“ постои правило кое вели „Ако носиш оружје, треба да бидеш подготвен да го употребиш“


Како и да е. Се надевам дека ќе се продолжи со придонес на идеи, како и дека некој ќе оспори и побие некој од овие мои ставови.

01 ноември, 2005

Поменот пројде...

...скапан мерач дојде. Но за тоа по тоа.

Денеска поменот пројде во најдобар ред и мир. Се појавија доста медиуми (Телма, Канал 5, МТВ, МИА, Дневник, итн.), сите земаа по една изјава, ги снимија плакатите и благата пченица. Кој, што и како ќе објави останува да видиме.

Присуството на ADSL-џии беше слабо.

Како што веќе сите видовте, мерачот не работи. Никогаш не ни работел. Нема ни да работи. Барем не онака како што треба.

Дури и да проработи, вашите лични податоци се најнесигурни во рацете на АД „Македонски телекомуникации“, што може да се види и од рекетарската фирма Credit Express што работи за нив. Ако имате проблеми со мерачот и тој ви покажува цифри што не може ни во Велика Британија да ги направите на оној „24 мегабита за 24 фунти“ пакет, воопшто нека не ве чуди затоа што вашето корисничко име и лозинка можно е да ги имаат и други (дали вработени во Телеком или луѓе кои ја купиле од вработени во Телеком, сеедно).

И да повториме:
  • Основа за раскинување на договорот има.
  • Основа за поднесување тужба има.
  • „Враќање на старо“ нема да има. Барем не до следното лето.
Ако сакате да плаќате 1.990,00 денари за dial up ADSL, не ги раскинувајте договорите. Ако сакате Телеком да ви излезе со уште подобра понуда и поскапување за месец дена, не ги раскинувајте договорите. Ако сакате да ви праќаат писма во кои пишува дека сте разговарале со некој, а телефон не сте кренале месец дена, не ги раскинувајте договорите.

Мислам дека се е веќе кажано, јасно како ден и без потреба од натамошно детално образложување.

e-mail адресата за пријавување кон групната тужба е се уште bez_vrska@hotmail.com

31 октомври, 2005

Помен за Брз „ADSL“ Интернет

Вторник, 1.11.2005 г., со почеток во 11 часот, ожалостените пријатели и корисници на Брз „ADSL“ интернет, ќе одржат помен во чест на убиениот на плоштадот Македонија во Скопје. Сите членови на поширокото семејство на Брз „ADSL“ Интернет се поканети да дојдат и да му оддадеме почит.

По 12 часот, поворката ќе се упати кон најблискиот салон на АД „Македонски телекомуникации“, убиецот на Брз „ADSL“ Интернет, при што ќе бидат предадени преостанатите приговори и барања за раскинување на договорот со Непријателот.

Мала дигресија: Купете го утрешниот број на Дневник и свртете на 12-та страна.

Што се однесува до прашањата за раскинување на договорот:
  • МТ, со mail-от што ни го испрати на 14.10, како и со изјавите за медиумите, фактички повторно ги менува условите на договорот;
  • според законот за електронски комуникации, тоа ни дозволува да го раскинеме договорот без плаќање на „пенали“;
  • намалувањето на брзината и условувањето со „плати екстра ако сакаш брзина“ е безобразно кршење на договорот (т.е. менување на условите на договорот);
  • МТ официјално се уште стои на ставот дека ќе наплаќа пенали;
  • телефонските разговори (кои, најчесто, ги немало) се невалидни и за нив треба и посебен приговор да се напише (како што кажа некој во коментарите, треба да се користат истите - бирократски - оружја против нив);
  • никој од р-Еволуција не може да ви гарантира дека МТ нема да засмета пенали во следната телефонска сметка, но може да ви гарантираме дека секаков судски спор за истите може и ЌЕ биде добиен (одлична шанса да покажеме дека судството е на страната на законот);
  • групната тужба се подготвува. Имајте разбирање, таква работа не се прави за еден или два дена.
Се гледаме утре на плоштадот Македонија во Скопје на блага пченица и лаф-муабет за нашиот починат пријател Брз „ADSL“ Интернет.


РЅ: Иако главниот настан е предвиден да се одржи во Скопје, тоа не значи дека некој ги спречува членовите на поширокото семејство на Брз „ADSL“ Интернет да организираат помен во сопствените градови.

„Плакатот“

Најпрвин, извинување што појавата на „плакатот“ (т.е. „читуљата“) беше толку конспиративна, но сепак сакавме да имаме изненадување за Непријателот. Онака, понеделнички.

За оние што не го виделе и не се од Скопје или Битола (dte!), премиерно на блогот и Читуљата за нашиот пријател ADSL:

Free Image Hosting at www.ImageShack.us

30 октомври, 2005

Втора шанса за поднесување на новиот приговор

Доколку во саботата не успеавте да поднесете приговор, истиот е малку модификуван и можете да го поднесете во недела (само во Рамстор, Скопје) или понеделник (31.10.2005). За повеќе трк овде.

За пријавување за приклучување кон групната тужба против МТ кликнете овде.

29 октомври, 2005

Македонија - МТ 2:0 ?

Како што пишува на Багра, на некои луѓе денеска им стигнал писмен одговор од МТ, во кој ги известуваат дека одговорот им е раскинат и нема да плаќаат пенали. Меѓутоа на многу луѓе им стигнал и писмен одговор во кој се известуваат дека „во телефонски разговор“ со вработен во АД „Македонски телекомуникации“ тие се откажале од раскинување на договорот.

Впрочем, ниту едно од тие писма не се однесува во целост на Приговорот што беше постиран на овој блог. Воопшто не се ни помачиле да видат за кој корисник станува збор, ниту пак што пишува во приговорите. Одговорите се шаблонски и на безобразен начин ја злоупотребуваат неинформираноста на повеќето корисници кои по телефон беа принудени, со закана, да одговорат дали ќе останат на ADSL или ќе го раскинат договорот со плаќање пенали.

Како што гледате од примерот на Ковач, пенали не им се наплатија на оние што поднесоа барање за раскинување договор. Дури и телефонските закани беа лажни! До каде ќе го тераат Телеком ова? За што следно ќе не излажат нас, нивните корисници?!